تل ابیب

تل ابیب اسرائیل کا دوسرا بڑا شہر ہے۔ اس کی آبادی کا تخمینہ تقریباً 3 لاکھ 91 ہزار نفوس ہے۔ اس شہر کا کل رقبہ 51.8 مربع کلومیٹر ہے اور ام البلد میں کل 31 لاکھ سے زائد افراد آباد ہیں (بمطابق 2008ء)۔ تل ابیب یافو بلدیہ یہاں کے انتظام کی ذمہ داری نبھاتی ہے، جس کے سربراہ رون ہلدائی ہیں۔

تل ابیب کی بنیاد 1909ء میں تاریخی ساحلی شہر یافا کے باہر بحیرہ روم کے ساحلوں رکھی گئی تھی۔ اس شہر کی آبادی میں اضافے کے ساتھ ہی یافا کی اہمیت کم ہوتی گئی، جو کہ عربوں کا اس علاقے میں سب سے بڑا مرکز گردانا جاتا تھا۔ 1950ء میں، اسرائیل کے معرض وجود میں آنے کے دو سال بعد تل ابیب اور یافا کو ایک ہی بلدیہ میں ضم کر دیا گیا۔ تل ابیب کا "سفید شہر" یونیسکو کے عالمی ثقافتی ورثے کا حصہ ہے جو کہ 2003ء میں شامل کیا گیا۔

تل ابیب کا شمار عالمی شہروں میں کیا جاتا ہے، جو کہ اسرائیلی معیشت کا بڑا مرکز اور ملک کا امیر ترین شہر ہے۔ یہاں بین الاقوامی اہمیت کے حامل دفاتر اور تحقیق کے شعبہ جات واقع ہیں۔ یہاں کے خوبصورت ساحل، شراب خانے، چائے خانے، ریستوراں، تجارتی مراکز، موسمی حالات اور نہایت جدید طرز زندگی نے اسے ایک معروف سیاحتی مرکز کا درجہ دلایا ہے۔ یہ اسرائیلی معیشت کی ریڑھ تصور کیا جاتا ہے اور اس کی خاصیت فنون اور تجارتی مرکز کے طور پر عیاں ہے۔ 2008ء میں فارن پالیسی جریدے نے بین الاقوامی اہمیت کے شہروں کی فہرست میں تل ابیب کو 42 واں درجہ دیا۔ تل ابیب دنیا کا 17 واں مہنگا ترین شہر ہے۔

جڑواں شہر[ترمیم]

تل ابیب کو دنیا بھر کے 27 شہروں کے ساتھ جڑواں قرار دیا گیا ہے جبکہ  لاس اینجلس ، امریکہ کے ساتھ یہ شراکت دار شہر ہے۔ جڑواں شہروں کی فہرست درج ذیل ہے:

ازمیر ، ترکی از 1998ء  الماتے ، قازقستان از 1999ء  انچیون ، جنوبی کوریا از 2000ء  ایسن ، جرمنی از 1992ء  بداپست ، ہنگری از 1989ء  برشلونہ ، ہسپانیہ از 1998ء  بلغراد ، سربیا از 1990ء  بون ، جرمنی از 1983ء  بیجنگ ، چین از 1995ء

بیونس آئرس ، ارجنٹائن از 1988ء  چشیناؤ ، مالدووا از 2000ء  ساؤ پالو ، برازیل از 2004ء  سالونیکا ، یونان از 1994ء  صوفیہ ، بلغاریہ از 1992ء  طولوس ، فرانس از 1962ء  غزہ ، فلسطین از 1998ء  فرینکفرٹ ، جرمنی از 1980ء  فلاڈیلفیا ، امریکہ از 1967ء

کانے ، فرانس از 1993ء  کولون ، جرمنی از 1979ء  لوز ، پولینڈ از 1994ء  لیماسول ، قبرص از 2000ء  ماسکو ، روس از 2000ء  میلان ، اطالیہ از 1994ء  نیو یارک شہر ، امریکہ از 1996ء  وارسا ، پولینڈ از 1992ء  ویانا ، آسٹریا از 2005ء